Молитвами  святых  отец  наших,  Господи  Иисусе  Христе,  Боже  наш,  помилуй  нас.  Аминь.
  Боже, милостив буди мне, грешному. (Поклон земный или поясный)
Боже, очисти мя, грешного, и помилуй мя. (Поклон)
Создавый мя, Господи, помилуй мя. (Поклон)
Без числа согреших, Господи, прости мя. (Поклон)
Владычице моя, Пресвятая Богородице, спаси мя грешнаго. (Поклон)
Ангеле, хранителю мой святый, от всякаго зла сохрани мя. (Поклон)
Святые мученицы Веро, Надеждо, Любы и мати их София, молите Бога о мне. (Поклон)
 Слава  Тебе,  Боже  наш,  слава  Тебе.
 Царю  Небесный,  Утешителю,  Душе  истины,  Иже  везде  сый  и  вся  исполняяй,  сокровище  благих  и  жизни  подателю,  прииди  и  вселися  в  ны,  и  очисти  ны  от  всякия  скверны,  и  спаси,  Блаже,  души  наша.
 Святый  Боже,  Святый  Крепкий,  Святый  Безсмертный,  помилуй  нас.  (Читается  трижды,  с  крестным  знамением  и  поясными  поклонами.)
 Слава  Отцу  и  Сыну  и  Святому  Духу,  и  ныне  и  присно  и  во  веки  веков.  Аминь.
 Пресвятая  Троице,  помилуй  нас;  Господи,  очисти  грехи  наша;  Владыко,  прости  беззакония  наша;  Святый,  посети  и  исцели  немощи  наша,  имени  Твоего  ради.
 Господи,  помилуй.  (Трижды.)  Слава  Отцу  и  Сыну  и  Святому  Духу,  и  ныне  и  присно  и  во  веки  веков.  Аминь.
 Отче  наш,  Иже  еси  на  небесех!  Да  святится  имя  Твое,  да  приидет  Царствие  Твое,  да  будет  воля  Твоя,  яко  на  небеси,  и  на  земли.  Хлеб  наш  насущный  даждь  нам  днесь;  и  остави  нам  долги  наша,  якоже  и  мы  оставляем  должником  нашим;  и  не  введи  нас  во  искушение,  но  избави  нас  от  лукаваго.
 Господи  Иисусе  Христе,  Сыне  Божий,  помилуй  нас,  аминь.
 Господи,  помилуй.  (12  раз.)  Слава  Отцу  и  Сыну  и  Святому  Духу,  и  ныне  и  присно  и  во  веки  веков.  Аминь.
 Приидите,  поклонимся  Цареви  нашему  Богу.  (Поклон.) Приидите,  поклонимся  и  припадем  Христу,  Цареви  нашему  Богу.  (Поклон.) Приидите,  поклонимся  и  припадем  Самому  Христу,  Цареви  и  Богу  нашему.  (Поклон.)

Тропарь,  глас  4

 Торжествует  Церковь  первородных  и  свеселится  приемля  матерь  о  чадех  веселящуюся,  яже,  яко  мудрости  тезоименитая,  тройственным  богословским  добродетелем  равночисленныя  породи.  Тыя  с  мудрыми  девами  зрит  уневестившияся  Жениху  Богу  Слову.  С  нею  и  мы  духовне  в  памяти  их  свеселимся,  глаголюще:  Троицы  поборницы,  Веро,  Любве  и  Надеждо,  в  вере,  любви  и  надежде  утверждайте  нас.  (Дважды.)
Слава  Отцу  и  Сыну  и  Святому  Духу,  и  ныне  и  присно  и  во  веки  веков.  Аминь.
  Еже  от  века  утаенное  и  Ангелом  несведомое  таинство,  Тобою,  Богородице,  сущим  на  земли  явися  Бог,  в  неслитном  соединении  воплощаемь,  и  Крест  волею  нас  ради  восприим,  имже  воскресив  первозданнаго,  спасе  от  смерти  души  наша.

Псалом  50

 Помилуй  мя,  Боже,  по  велицей  милости  Твоей,  и  по  множеству  щедрот  Твоих  очисти  беззаконие  мое.  Наипаче  омый  мя  от  беззакония  моего,  и  от  греха  моего  очисти  мя;  яко  беззаконие  мое  аз  знаю,  и  грех  мой  предо  мною  есть  выну.  Тебе  единому  согреших  и  лукавое  пред  Тобою  сотворих;  яко  да  оправдишися  во  словесех  Твоих,  и  победиши  внегда  судити  Ти.  Се  бо,  в  беззакониях  зачат  есмь,  и  во  гресех  роди  мя  мати  моя.  Се  бо,  истину  возлюбил  еси;  безвестная  и  тайная  премудрости  Твоея  явил  ми  еси.  Окропиши  мя  иссопом,  и  очищуся;  омыеши  мя,  и  паче  снега  убелюся.  Слуху  моему  даси  радость  и  веселие;  возрадуются  кости  смиренныя.  Отврати  лице  Твое  от  грех  моих  и  вся  беззакония  моя  очисти.  Сердце  чисто  созижди  во  мне,  Боже,  и  дух  прав  обнови  во  утробе  моей.  Не  отвержи  мене  от  лица  Твоего  и  Духа  Твоего  Святаго  не  отыми  от  мене.  Воздаждь  ми  радость  спасения  Твоего  и  Духом  Владычним  утверди  мя.  Научу  беззаконныя  путем  Твоим,  и  нечестивии  к  Тебе  обратятся.  Избави  мя  от  кровей,  Боже,  Боже  спасения  моего;  возрадуется  язык  мой  правде  Твоей.  Господи,  устне  мои  отверзеши,  и  уста  моя  возвестят  хвалу  Твою.  Яко  аще  бы  восхотел  еси  жертвы,  дал  бых  убо:  всесожжения  не  благоволиши.  Жертва  Богу  дух  сокрушен;  сердце  сокрушенно  и  смиренно  Бог  не  уничижит.  Ублажи,  Господи,  благоволением  Твоим  Сиона,  и  да  созиждутся  стены  Иерусалимския.  Тогда  благоволиши  жертву  правды,  возношение  и  всесожегаемая;  тогда  возложат  на  олтарь  Твой  тельцы.

 Верую во единаго Бога Отца, Вседержителя, Творца небу и земли, видимым же всем и невидимым. И во единаго Господа Иисуса Христа, Сына Божия, Единороднаго, Иже от Отца рожденнаго прежде всех век; Света от Света, Бога истинна от Бога истинна, рожденна, несотворенна, единосущна Отцу, Имже вся быша. Нас ради человек и нашего ради спасения сшедшаго с небес и воплотившагося от Духа Свята и Марии Девы, и вочеловечшася. Распятаго же за ны при Понтийстем Пилате, и страдавша, и погребенна. И воскресшаго в третий день по Писанием. И возшедшаго на небеса, и седяща одесную Отца. И паки грядущаго со славою судити живым и мертвым, Егоже Царствию не будет конца. И в Духа Святаго, Господа, Животворящаго, Иже от Отца исходящаго, Иже со Отцем и Сыном спокланяема и сславима, глаголавшаго пророки. Во едину Святую, Соборную и Апостольскую Церковь. Исповедую едино крещение во оставление грехов. Чаю воскресения мертвых, и жизни будущаго века. Аминь.

Песнь  1

Ирмос:  Твоя  победительная  десница  боголепно  в  крепости  прославися.  Та  бо,  Безсмертне,  яко  всемогущая,  противныя  сотре,  израильтяном  путь  глубины  новосоделавшая.
  Припев:  Святии  мученицы  Веро,  Надеждо,  Любве  и  Софие,  молите  Бога  о  нас. 
Премирныя  Твоея,  Христе,  и  несказанныя  премудрости  осияние  даруй  мне,  Владыко,  благолепныя  и  благославныя  Твоея  мученицы,  яко  да  воспою  Софиина  прозябения.
Святии  мученицы  Веро,  Надеждо,  Любве  и  Софие,  молите  Бога  о  нас. 
Нарицание  Твое  яве  жительством,  богомудрая,  украсися:  всю  бо  проводила  еси  жизнь  твою  премудрости  желанием,  славная  Софие,  мудрости  осиявшися  благодатию.
Святии  мученицы  Веро,  Надеждо,  Любве  и  Софие,  молите  Бога  о  нас. 
Твой  всеблаженный  плод,  Пребожественныя  Троицы  количеством  украшаемь,  страдальчески  за  Ону  подвизася,  всемудрая  Софие,  Премудрости  божественныя  тезоименитая.
Слава:  Тело  и  душу  добродетельми  очистивше,  девы  отроковицы,  три  Тебе  приведошася,  мученически,  умному  Жениху  Христу,  Вера  с  Надеждею  и  Любовь  славная.
И  ныне:  Весь  зрак  мой  приим,  иже  во  зраце  Божии  прежде  зримь,  всего  обнови,  в  Твоем  чреве  боголепно  вселився,  Пречистая.  Темже  Богородицу  вернии  Тя  вси  славим.

Молите  Бога  о  нас,  святии  мученицы  Веро,  Надеждо,  Любве  и  Софие,  яко  мы  усердно  к  вам  прибегаем,  скорым  помощницам  и  молитвенницам  о  душах  наших.  (Поклон.)

Песнь 3

Ирмос:  Едине  ведый  человеческаго  существа  немощь,  и  милостивно  в  не  воображся,  препояши  мя  с  высоты  силою,  еже  вопити  Тебе,  Святый:  одушевленный  храме,  неизреченныя  славы  Твоея,  Человеколюбче.
Святии  мученицы  Веро,  Надеждо,  Любве  и  Софие,  молите  Бога  о  нас.
Гласа  послушавше  Христова,  зовуща  к  безсмертней  и      безстрастней      жизни,      последоваша    венценосицы  девы  и  мученицы,  еже  вопити  Тебе,  Святый:  храме      одушевленный,      пречистыя      славы  Твоея,  Человеколюбче.
Святии  мученицы  Веро,  Надеждо,  Любве  и  Софие,  молите  Бога  о  нас.
Крепость  дарова  Христос  стоящим  пред  судищем  мученически  вам,  яко  обещася,  и  богодохновенныя  мудрости  исполни,  и  светлы  показа  победоносныя  мученицы,  девства  сияюща  благодатию.
Святии  мученицы  Веро,  Надеждо,  Любве  и  Софие,  молите  Бога  о  нас.
Притуписте  ум  вражий,  девы,  великохвальный,  и  того  гордыню  низложисте,  великомудренно  подвигшеся,  и  прежде  хвалящагося  истребити  море,  теченми  кровей  потописте.
Слава:  Мудрости  вышния  Христовы  богатно  насытившеся,  избранныя  мудрости  и  благоумныя,  дщери  три  посрамиша  мучащих  сверепства  и  неистовство  недержное,  витийствующе  божественная  учения.
И  ныне:  Святых  Святаго  Христа  свято  породила  еси,  святыни  святое  селение,  во  святых  почивающаго.  Емуже  вопием:  свят  храм  одушевленный  неизреченныя  славы  Твоея,  Человеколюбче.

Молите  Бога  о  нас,  святии  мученицы  Веро,  Надеждо,  Любве  и  Софие,  яко  мы  усердно  к  вам  прибегаем,  скорым  помощницам  и  молитвенницам  о  душах  наших.  (Поклон.)
Господи  помилуй.  (Трижды.)

Агницы  словесныя  Агнца  и  Пастыря,  огню  и  лютым  мукам  предани  бысте,  и  явистеся  Ангелом  равночестни.  Тем  вси  священную  вашу  память  празднуем  в  веселии  сердца,  девы  богомудрыя.
Слава  Отцу  и  Сыну  и  Святому  Духу,  и  ныне  и  присно  и  во  веки  веков.  Аминь.
  Молитвы  Твоих  раб  приими,  Богородице,  и  избави  нас  от  всякия  беды,  яко  родила  еси  Христа  Спаса,  Избавителя  душ  наших.

Песнь 4

  Ирмос:  Гору,  Тя,  благодатию  Божиею  приосененную,  прозорливыма  Аввакум  усмотрив  очима  из  Тебе  изыти  Израилеву,  провозглашаше,  Святому,  во  спасение  наше  и  обновление.
Святии  мученицы  Веро,  Надеждо,  Любве  и  Софие,  молите  Бога  о  нас.
Укрепльшеся  божественною  благодатию,  добропобедныя,  Вера,  Любовь  и  Надежда,  мучителей  прещения  мужественно  посрамиша,  огнем  всесожегаемы  всемудрыя,  и  Жениху  Христу  приводимы.
Святии  мученицы  Веро,  Надеждо,  Любве  и  Софие,  молите  Бога  о  нас.
Возмогоша,  Креста  всеоружием  оградившеся,  Вера,  Любовь  и  Надежда,  мучений  благомощно  раны  стерпети  святыя,  даже  до  кровей  крепчайше  ко  греху  противльшеся.
Слава:  Свещи  тричисленныя  мудрости  сияющия,  Вера,  Любовь  и  Надежда,  Троицы  просвещенми  яве  блистающияся,  пресветло  Церкви  просвещают,  ко  спасению  нашему  и  защищению.
И  ныне:  Святых  святая  Богородице  всепетая,  ожидание  языков  и  спасение  верных,  из  Тебе  возсия  Избавитель,  и  Жизнодавец  и  Господь,  во  спасение  нас  поющих  Тя.

Молите  Бога  о  нас,  святии  мученицы  Веро,  Надеждо,  Любве  и  Софие,  яко  мы  усердно  к  вам  прибегаем,  скорым  помощницам  и  молитвенницам  о  душах  наших.  (Поклон.)

Песнь 5

Ирмос:  Просветивый  сиянием  пришествия  Твоего,  Христе,  и  осветивый  Крестом  Твоим  мира  концы,  сердца  просвети  светом  Твоего  богоразумия,  православно  поющих  Тя.
Святии  мученицы  Веро,  Надеждо,  Любве  и  Софие,  молите  Бога  о  нас.
Терпением  мудрований  муки  подъемляху,  и  мудрости  сущия  в  Бозе  глаголюще  тайны,  держащаго  посрамиша  три  девы  богоносныя,  верою  и  естеством  связуеми.
Святии  мученицы  Веро,  Надеждо,  Любве  и  Софие,  молите  Бога  о  нас.
Радуется  прамати,  видящи  побеждаема  льстиваго,  из  Едема  древле  изгнавшаго  сию,  женами  богомудрыми,  Надеждою,  Верою  и  Любовию,  Софии  рожденьми.
Слава:  Ядовитаго  мучителева  ласкания  избегоша,  и  мучений  язвы  вольно  претерпеша,  честныя  отроковицы,  Твоею  любовию  уязвльшеся,  Христе,  и  божественным  Твоим  рачением.
И  ныне:  Веселятся  небесныя  силы  видяще  Тя,  радуются  с  ними  человеков  состояния,  Рождеством  бо  соединишася  Твоим,  Дево  Богородице,  Егоже  достойно  славим.

Молите  Бога  о  нас,  святии  мученицы  Веро,  Надеждо,  Любве  и  Софие,  яко  мы  усердно  к  вам  прибегаем,  скорым  помощницам  и  молитвенницам  о  душах  наших.  (Поклон.)

Песнь  6

 Ирмос:  Обыде  нас  последняя  бездна,  несть  избавляяй,  вменихомся  яко  овцы  заколения,  спаси  люди  Твоя,  Боже  наш,  Ты  бо  крепость  немощствующих  и  исправление.
Святии  мученицы  Веро,  Надеждо,  Любве  и  Софие,  молите  Бога  о  нас.
Радующеся,  во  Твои,  Владыко,  пречистыя  длани  возложиша  надежды,  отроковицы  три,  Троицы  количеством  и  числом  почтенныя  и  похваляемыя.
Святии  мученицы  Веро,  Надеждо,  Любве  и  Софие,  молите  Бога  о  нас.
Светящеся  девства  добротами,  мученическими  увязеньми  украсишася,  и  венец  сугуб  свыше  достойне  прияша  от  Христа  Жизнодавца  и  всещедраго.
Слава:  Приведошася,  Владыко,  в  храм  Твой  всех  царствующаго  девственная  сокровища  честная, приобщитися  Царствию  Твоему,  Ты  бо  тех  и  свет  еси  и  веселие.
И  ныне:  Радуются  о  Тебе  Дево  пречистая,  рода  нашего  праотцы,  Едем  восприемше  Тобою,  егоже  преступлением  погубиша.  Ты  бо  чиста  и  прежде  рождества  и  по  рождестве  еси.

Молите  Бога  о  нас,  святии  мученицы  Веро,  Надеждо,  Любве  и  Софие,  яко  мы  усердно  к  вам  прибегаем,  скорым  помощницам  и  молитвенницам  о  душах  наших.  (Поклон.)

Господи  помилуй  (Трижды.)  Слава  Отцу  и  Сыну  и  Святому  Духу,  и  ныне  и  присно  и  во  веки  веков.  Аминь.
Кондак,  глас  4-й
Софии  честныя  священнейшия  ветви,  Вера,  и  Надежда,  и  Любовь,  показавшеся,  мудрость  обуиша  еллинскую  благодатию,  и  пострадавше,  и  победоносицы  явившеся,  венцем  нетленным  от  всех  Владыки  Христа  увязошася.

Песнь  7

 Ирмос:  Тебе  умную,  Богородице,  пещь  разсмотряем  вернии,  якоже  бо  отроки  спасе  три  превозносимый,  мир  обнови,  во  чреве  Твоем  всецел,  хвальный  отцев  Бог  и  препрославлен.
Святии  мученицы  Веро,  Надеждо,  Любве  и  Софие,  молите  Бога  о  нас.
Трисиянною  единства  благодатию,  озаряеми  яве  девы,  демонское  разрушиша  тмонеистовство,  свет  Триипостасный  благословяще  и  поюще,  хвальный  отцев  Бог  и  препрославлен.
Святии  мученицы  Веро,  Надеждо,  Любве  и  Софие,  молите  Бога  о  нас.
На  небесех  чертоги  имуще  свещеносныя  души,  со  Ангелы  весело  ныне  ликовствуете,  славу  присносущную  зряще,  и  глаголюще:  хвальный  отцев  Бог  и  препрославлен.
Слава:  Терпеливо  яко  отроцы  противление  показавше,  огнь  попраша  мужественно,  тех  бо  равночисленнии  разум  равностатный  богоносныя  стяжаша,  хвальнаго  отцев  присно  Бога  и  препрославленнаго.
И  ныне:  Даеши,  Чистая,  оставление  прегрешений  воспевающым  Тя  верно,  избавляющи  напастей,  и  всякаго  обстояния,  Тя  бо  ныне  стяжахом  прибежище,  Богоневестная,  яко  хвальнаго  отцев  Бога  руками  носившая.

Молите  Бога  о  нас,  святии  мученицы  Веро,  Надеждо,  Любве  и  Софие,  яко  мы  усердно  к  вам  прибегаем,  скорым  помощницам  и  молитвенницам  о  душах  наших.  (Поклон.)

Песнь 8

Ирмос:  В  пещи  отроцы  Израилевы,  якоже  в  горниле  добротою  благочестия  чистее  злата  блещахуся,  глаголюще:  благословите,  вся  дела  Господня,  Господа,  пойте  и  превозносите  во  вся  веки.
Святии  мученицы  Веро,  Надеждо,  Любве  и  Софие,  молите  Бога  о  нас.
Девы  богосветлыя,  Вера,  Надежда,  Любовь,  добротою  благочестия  чистее  злата  блещахуся,  глаголюще:  благословите,  вся  дела  Господня,  Господа,  пойте  и  превозносите  во  вся  веки.
Святии  мученицы  Веро,  Надеждо,  Любве  и  Софие,  молите  Бога  о  нас.
Сияющия,  и  световидныя  мучением  проявленно  бывшыя  девы,  вернии  воспоим  глаголюще:  благословите,  вся  дела  Господня,  Господа,  пойте  и  превозносите  во  вся  веки.
Слава:  Врачевств  струю  обильно,  довольно  и  богатно  раки  страстотерпиц  источают  присно,  верою  зовущым:  благословите,  вся  дела  Господня,  Господа,  пойте  и  превозносите  во  вся  веки.
И  ныне:  Земля  святая  была  еси,  Чистая,  жизноносный  клас  рождшая,  присносущныя  жизни  ходатая  Христа,  Емуже  вси  зовем:  благословите,  вся  дела  Господня,  Господа,  пойте  и  превозносите  во  вся  веки.

Молите  Бога  о  нас,  святии  мученицы  Веро,  Надеждо,  Любве  и  Софие,  яко  мы  усердно  к  вам  прибегаем,  скорым  помощницам  и  молитвенницам  о  душах  наших.  (Поклон.)

Песнь 9

Ирмос:  Образ  чистаго  Рождества  Твоего,  огнепалимая  купина  показа  неопальная.  И  ныне  на  нас  напастей  свирепеющую  угасити  молимся  пещь,  да  Тя,  Богородице,  непрестанно  величаем.
Святии  мученицы  Веро,  Надеждо,  Любве  и  Софие,  молите  Бога  о  нас.
Светом  Трисиянным  исполняеми,  и  сияния  божественнаго  ныне  насыщающеся,  купноименныя  добродетелей  и  тождеименныя,  любве,  надежди,  и  веры,  надеждею  и  любовию  ны  и  верою  утвердите.
Святии  мученицы  Веро,  Надеждо,  Любве  и  Софие,  молите  Бога  о  нас.
Да  вышняя  крепость  ныне  укротит  обдержащую  бурю  ереси,  о  страстотерпицы  непобедимии,  и  подаст  верным  единоумие,  просите,  молим  непрестанно,  добродевы.
Слава:  Нощь  жития  всемудрыя  прешедше,  день  постигосте  невечерний,  мученически  веселящеся,  и  в  девственно  хвалящеся  благодатию,  и  Божественнаго  Царствия  нетленнаго  сподобляеми.
И  ныне:  О  како  Дева  роди  присносущее  Слово  и  ипостасное,      сияние      Отчия      Ипостаси,      нашего  Благодетеля    и      Господа,    из      Нея    воплощшася,  Егоже  достойно  величаем.

Молите  Бога  о  нас,  святии  мученицы  Веро,  Надеждо,  Любве  и  Софие,  яко  мы  усердно  к  вам  прибегаем,  скорым  помощницам  и  молитвенницам  о  душах  наших.  (Поклон.)

Владычице,  приими  молитву  раб  Своих  и  избави  нас  от  всякия  нужды  и  печали,  Ты  еси,  Богородице,  оружие  наше  и  стена,  Ты  еси  заступница,  и  к  Тебе  прибегаем,  Тя  и  ныне  на  молитву  призываем,  да  избавиши  нас  от  врагов  наших.  Возвеличим  Тя  вси,  всенепорочную  Матерь  Христа  Бога,  Юже  осени  Дух  Пресвятый.  (Поклон.)
Святый  Боже,  Святый  Крепкий,  Святый  Безсмертный,  помилуй  нас.  (Читается  трижды,  с  крестным  знамением  и  поясными  поклонами.)
Слава  Отцу  и  Сыну  и  Святому  Духу,  и  ныне  и  присно  и  во  веки  веков.  Аминь.
Пресвятая  Троице,  помилуй  нас;  Господи,  очисти  грехи  наша;  Владыко,  прости  беззакония  наша;  Святый,  посети  и  исцели  немощи  наша,  имени  Твоего  ради.
Господи,  помилуй.  (Трижды.)  Слава  Отцу  и  Сыну  и  Святому  Духу,  и  ныне  и  присно  и  во  веки  веков.  Аминь.
Отче  наш,  Иже  еси  на  небесех!  Да  святится  имя  Твое,  да  приидет  Царствие  Твое,  да  будет  воля  Твоя,  яко  на  небеси,  и  на  земли.  Хлеб  наш  насущный  даждь  нам  днесь;  и  остави  нам  долги  наша,  якоже  и  мы  оставляем  должником  нашим;  и  не  введи  нас  во  искушение,  но  избави  нас  от  лукаваго.

Тропарь

Торжествует  Церковь  первородных  и  свеселится  приемля  матерь  о  чадех  веселящуюся,  яже,  яко  мудрости  тезоименитая,  тройственным  богословским  добродетелем  равночисленныя  породи.  Тыя  с  мудрыми  девами  зрит  уневестившияся  Жениху  Богу  Слову.  С  нею  и  мы  духовне  в  памяти  их  свеселимся,  глаголюще:  Троицы  поборницы,  Веро,  Любве  и  Надеждо,  в  вере,  любви  и  надежде  утверждайте  нас. 
Слава  Отцу  и  Сыну  и  Святому  Духу

Кондак

Софии  честныя  священнейшия  ветви,  Вера,  и  Надежда,  и  Любовь,  показавшеся,  мудрость  обуиша  еллинскую  благодатию,  и  пострадавше,  и  победоносицы  явившеся,  венцем  нетленным  от  всех  Владыки  Христа  увязошася.
И  ныне  и  присно  и  во  веки  веков.  Аминь.
Еже  от  века  утаенное  и  Ангелом  несведомое  таинство,  Тобою,  Богородице,  сущим  на  земли  явися  Бог,  в  неслитном  соединении  воплощаемь,  и  Крест  волею  нас  ради  восприим,  имже  воскресив  первозданнаго,  спасе  от  смерти  души  наша.
Господи,  помилуй  (40  раз).

Молитва 1

О  святыя  и  достохвальныя  мученицы  Веро,  Надеждо,  Любве  и  доблестных  дочерей  мати  Софие!  К  вам  ныне  с  усердною  молитвою  притекаем.  Что  бо  паче  возможет  предстательствовати  за  ны  пред  Господом,  аще  не  вера,  надежда  и  любы,  три  сия  добродетели  пребывающия,  во  ихже  образ  нареченныя,  самою  вещию  оныя  явисте?  Умолите  убо  Господа,  да  в  скорбех  и  напастех  неизреченною  благодатию  Своею  покрыет  ны  и  сохранит,  и  Того  славу,  яко  солнце  незаходимое,  зрети  да  сподобит.  Споспешествуйте  нам  во  смиренных  молениих  наших,  да  простит  Господь  Бог  грехи  и  беззакония  наша,  и  да  помилует  нас  грешных,  и  щедрот  Своих  да  сподобит  нас  Христос  Бог,  Емуже  славу  возсылаем,  со  Безначальным  Его  Отцем,  и  с  Пресвятым  и  Благим  и  Животворящим  Его  Духом,  ныне  и  присно  и  во  веки  веков.  Аминь.

Молитва 2

Вас,  святыя  мученицы  Веро,  Надеждо  и  Любве,  славим,  величаем  и  ублажаем,  купно  с  мудрою  материю  Софиею,  ейже  покланяемся,  яко  образ  богомудраго  попечения  являющей.  Умоли,  святая  Веро,  Творца  видимых  и  невидимых,  да  веру  крепку,  неблазненну  и  нерушиму  подаст  нам.  Ходатайствуй,  святая  Надеждо,  пред  Господем  Иисусом  за  нас  грешных,  да  упование  на  благая  Своя  не  отженет  от  нас,  и  от  всякия  скорби  и  нужды  да  избавит  ны.  Исповеждь,  святая  Любве,  Духу  истины,  Утешителю,  напасти  и  печали  наша,  да  Той  свыше  сладость  небесную  низпослет  душам  нашим.  Помозите  убо  в  бедах  наших,  святыя  мученицы,  и  купно  с  мудрою  материю  вашею  Софиею,  молите  Царя  царей  и  Господа  господствующих,  да  сохранит  под  покровом  Своим  богохранимое  Отечество  наше,  поспешение  во  благих  людем  Своим  даруя.  Такожде  и  о  всех  нас  вашего  теплаго  предстателъства  пред  Богом  усердно  молим,  да  купно  с  вами  и  со  всеми  святыми  превознесем  и  препрославим  пресвятое  и  великое  имя  Отца  и  Сына  и  Святаго  Духа  Бога,  предвечнаго  Владыки  и  благих  Содетеля,  ныне  и  присно  и  во  веки  веков.  Аминь.

Честнейшую  Херувим  и  славнейшую  без  сравнения  Серафим,  без  истления  Бога  Слова  рождшую,  сущую  Богородицу  Тя  величаем.  (Поклон.)

Слава  Отцу  и  Сыну  и  Святому  Духу (поклон),  И  ныне  и  присно  и  во  веки  веков.  Аминь (поклон).  Господи,  помилуй  (трижды).  Господи,  благослови.  

Господи  Иисусе  Христе  Сыне  Божий,  молитвами  Пречистыя  Твоея  Матере,  святых  мучениц Веры,  Надежды,  Любве  и  Софие и  всех  святых,  помилуй  и  спаси  нас,  яко  Благ  и  Человеколюбец.  Аминь.

Господи,  помилуй  (трижды).

По  желанию  трижды  читаем  тропарь  о  здравии:

Милостиве  Господи,  спаси  и  помилуй  раб  Твоих,  имена  их  (поклон).  Избави  их  от  всякия  скорби,  гнева  и  нужды  (поклон),  от  всякия  болезни  душевныя  и  телесныя  (поклон).  Прости  им  всякое  согрешение,  вольное  и  невольное  (поклон),  и  душам  нашим  полезная  сотвори  (поклон).

Величание 

Величаем  вас,  святыя  мученицы,  Веро,  Надеждо,  Любве  и  Софие,  и  чтим  святыя  страдания  ваша,  яже  за  Христа  претерпели  есте.